III «Tamga» режиссерлар лабораториясе

19-24 апрельдә Г.Кариев исемендәге Казан Татар дәүләт яшь тамашачы театрында «Tamga» режиссерлар лабораториясе уза. Лабораториядә балалар һәм яшүсмерләр өчен спектакльләр чыгаручы яшь Мәскәү режиссерлары катнаша: Тимур Кулов, Тимур Шәрәфетдинов һәм Александр Кудряшов.

Алар алты көн дәвамында театр артистлары белән берлектә эскизлар әзерли. 24 нче апрельдә эскизлар киң җәмәгатьчелеккә күрсәтеләчәк. Чараның төгәл вакытын өстәмә хәбәр итәчәкбез.  III нче «TAMGA» режиссерлар лабораториясе кысаларында куелган эскизларны карар өчен Мәскәү тәнкыйтъчеләре Владислава Куприна һәм Анна Казарина чакырылды.

Театр һәрчак заман ритмнарын тоеп эш итә. Лаборатория – театрның үз алдына куйган сынавы да, яңа темаларга һәм жанрларга, иҗади тандемнарга чыгу ысулы да. Быелгы «Tamga»ның темасы – «Мин. Мәктәп. Дөнья». Без сезне яшүсмер һәм аның яшәеше, омтылышлары, проблемалары турында уйланырга, сөйләшергә чакырабыз.

Режиссерлар татар сәхнәсе өчен көтелмәгән, четерекле темалар кузгатачак: балалар һәм өлкәннәр арасындагы упкын, аны китереп чыгарган комплекслар һәм җавапсызлык, уйдырма дөньяга китеп яшәү, мәктәп һәм анда үз урыныңны табу юллары.